Cha's Try: 飲飽食醉於German Bierfest 2013

飲飽食醉於German Bierfest 2013

每年一度既德國啤酒節又開始左嘞~ 原來今年已經係第22屆! Cha年年都想去但一次都去唔成, 今年終於去左啦~~~ 仲要係免費入場任飲任食果種, hehe~~

西門子包場

其實Cha一向唔好啤酒呢類有汽既飲品, 不過聽聞氣氛好好, 又好熱鬧, 所以一直都想去感受下個氣氛!

大大隻德國啤酒杯

如同往年, Bierfest係Marco Polo Hotel 6樓停車場舉行。一到入口就已經有職員派發一隻勁重德國啤酒杯, 朋友話同去年一樣樣, 不過Cha就話唔同, 因為隻杯印左2013架嘛! 初頭仲諗 ”下, 用呢隻杯? 有無洗過架, 乾淨咩?” 之後就知係自己大鄉里左, 人地係有膠杯黎裝啤酒既, 好多人都套杯野飲落隻杯度扮下野咁!

好味德國豬手

各式各樣德國美食

現場佔左好大面積, 分帳篷同露天位, 有多個富有濃厚德國風味既食品灘位, 有各類肉食, 燒豬骨, 燒春雞, 羊髀, 牛肉, 香草三文魚等, 當然唔少得最出名既德國燒豬手同各式各樣既燒香腸啦, 唔想食咁多肉既就可以試下雜菌酥皮盒, 每一樣都配有德式side dish, 例如豬手配白汁焗薯片同紅椰菜, 燒香腸配薯蓉酸椰菜。Cha樣樣都想試, 可惜肚皮有限, 最後只好放棄羊髀同牛肉。除左主食, 仲有甜品, 如Cheese cake with berries, black forest cake, fruit tart, 焗酥皮蘋果卷, 仲有Movenpick 雪糕。當中Cha覺得最好味既係豬手, 燒香腸同焗酥皮蘋果卷。

仲有多款甜品同Movenpick雪糕

當然, 啤酒先係主角!!! 啤酒有三款, 有Lowenbrau, Beck, 同啤酒節限量版Lowenbrau Oktoberfestbier。攪笑既係原本飲唔到多, 只想要2杯啤酒, 但啤酒小姐熱情地話要比一Jar我地, 話好快飲晒…. 結果當然就係飲唔晒, 仲試唔晒三隻啤酒…… 唉…. 事實係要堅持既!!!! 但唔好以為得啤酒喎, 如果唔好啤酒, 仲有紅酒, 白酒, 唔飲酒既, 都有果汁, 汽水, 有氣礦泉水供人選擇。